Orinoco

Baixo o título "Orinoco. Viaxe a un mundo perdido", a Cidade da Cultura ofrece unha homenaxe á tradición cultural das doce etnias que habitan o Amazonas venezolano: De’áruwa (Piaroa), Ye’kuana, Yanomami, Híwi (Guahibo), E’ñepa (Panare), Wakuénai (Curripaco), Baniva, Baré, Puinave, Warekena, Tsase (Píapoco) e Hoti. Composta por unha ampla selección de obxectos utilitarios de cada un dos grupos indíxenas, a colección consta de máis de 1.500 pezas recompiladas durante cincuenta anos de exploracións: máscaras, cestería, adornos corporais, instrumentos musicais, plumarios, canoas, remos e instrumentos de pesca, obxectos de uso cotián e máxico-relixiosos, que están construídos con materiais da selva, partes de animais, plantas e minerais.

A Colección Orinoco propón unha inmersión no corazón da selva amazónica, onde apenas o un por cento da luz solar logra alcanzar o chan ao mediodía pero no que o ser humano atopou hai doce mil anos un acolledor fogar para vivir. A mostra é un canto á natureza virxe e ao respecto polo medio natural e un recoñecemento ás culturas tradicionais e a súa supervivencia no marco da biodiversidade.

A exposición, pertencente á Colección Patricia Phelps de Cisneros, poderá visitarse ata o 12 de xaneiro de 2014.

Imaxes:

1.- Vista xeral dunha das salas.

2.- Muller Yanomami tecendo unha cesta. 

3.- Carcajs (cilindros portadores de frechas).

4.- Maracas.

5.- Guapas (cestas).